De Earn - Klooster beroppen yn Earnewâld

Yn in bûtengewoane gearkomst op 16 augustus hat de tsjerkeried fan de herfoarme gemeente offisjeel in berop (33,33 % fan folsleine wurktiid) op my útbrocht.In opmerklik barren, sawol foar de gemeente as foar mysels. De lêste kear dat in Earnewâldster tsjerkeried selsstannich sa’n berop útbrocht hat, wie yn 1908.

Doe gong it om G.J.A. Offerhaus út Groot-Schermer, dy’t oant syn dea yn 1936 yn Earnewâld bleaun is.

Mei de dûmny’s en oare foargongers dêrnei gong it wat oars. Guon wienen tagelyk ek ferbûn yn in oare gemeente dêr’t Earnewâld mei kombinearre wie, oaren wienen bystân yn it pastoraat of helppreker.

Neat mis mei fansels, mar net lykas Offerhaus en syn trije foargongers (B. Bolleman van der Veen, D.L.E. Blankstein en J. Folpmers) offisjeel beroppen allinne troch de Earnewâldster tsjerkeried.

En sa hat ien fan de alderlytste gemeenten yn Fryslân de man beroppen dy’t al sûnt 19 juny 1983 as bystân yn it pastoraat by harren yn tsjinst wie.

De kombinaasje mei Westerwert

Opmerklik is it fansels ek foar mysels. In jier ferlyn hie ik net tinke kinnen dat myn karriêre yn de tsjerke sa’n ferrin krije soe. Foar guon lêzers dy’t dat net witte, is it tink ik goed om it ien en oar út te lizzen oer de dingen dy’t har de lêste tiid ôfspile hawwe.

Sûnt 19 juny 1983 wie ik offisjeel as dûmny ferbûn oan de herfoarme/protestantske gemeente Westerwert (Jorwert, Weidum, Bears en Jellum). Dizze gemeente foarme in ‘pseudo-kombinaasje’ mei herfoarme Earnewâld, dêr’t ik foar 25 % fan myn wurktiid oan ferbûn wie. Dat wie hiel goed te dwaan en ik haw lange jierren mei entoesjasme en foldwaning wurke yn beide gemeenten. Ek yn Westerwert haw ik in hiele goeie tiid hân. Lykwols ûnstienen dêr spannings mei de tsjerkeried, dy’t net op te lossen wienen. Doe’t ik dêr ein jannewaris fan dit jier melding fan makke by it breed moderamen fan de klassis Frjentsjer, hat dy my pleatst ûnder ordinânsje 3-19 fan de tsjerke-oarder, dat wol sizze frijsteld fan alle wurk oant der in definitive

regeling komt mei Westerwert. Op myn fersyk is der by dy frijstelling fuortendaliks in útsûndering makke foar it wurk yn Earnewâld.

Befêstiging op snein 3 oktober 2010

Omdat herfoarme Earnewâld ek graach mei my fierder woe, is der in tsjerkoarderlike regeling troffen dy’t it mooglik makket, dat ik foar 1/3 fan myn wurktiid yn dy gemeente beroppen wurde kin. En dat is dan no bard. It doel is dat ik yn de tsjinst op 3 oktober o.s. offisjeel as dûmny by de herfoarme gemeente befêstige wurde sil. Myn kollega drs. Yvonne Hiemstra, ferbûn oan de Feriene Kristlike Gemeente yn Dokkum en foarsitter fan it Frysk Oekumenysk Wurkferbân by ús yn Earnewâld, sil my befêstigje.

Nei dizze offisjele befêstiging, dêr't ik myn ja-wurd jaan moat op de amtsfragen en de offisjele befêstigings-wurden útsprutsen wurde, hâld ik dan myn yntreepreek. Dizze wol hiel bysûndere en feestlike tsjinst op 3 oktober sil in tsjinst wêze fan wurkferbân en herfoarme tsjerkeried beide.

It wurk yn Earnewâld giet troch

Ien fan de dingen dy’t by dy beroppingsproseduere ek dien wurde moast, wie it opstellen fan in wurkplan.

Wy ha yn de tsjerkeried ôfpraat dat it tal tsjinsten dêr’t ik yn foargean sil, lykas foarhinne bliuwe sil op achttjin yn it jier. En ek dat ik lykas foarhinne foar de iepenbiere kant op de Master Franke skoalle de godstsjinstlessen fersoargje sil. Om’t ik wat mear wurktiid krige haw (fan 25 % nei 33 1/3 %) sil ik ek dy minsken ris opsykje dy’t dan wol net yn it doarp wenje, mar hjir wol geregeld yn tsjerke komme of har op in oare wize mei ús gemeente ferbûn fiele.

Fansels sil ik, lykas foarhinne, ek beskikber wêze foar it FOWE, foar de Earnewâldster Rûnte en foar de redaksje fan it tydskrift de Earn. Datselde jildt foar de gearwurking mei de grifformearde tsjerke.

Ik hoopje dat wy sa meielkoar yn in goeie harmonije gearwurkje sille ta opbou fan it geastlik libben yn Earnewâld en dat wy in goeie tiid yn de mjitte gean meie.

Rienk Klooster