FOWE  -  De Earn

Maart 2013

Seiderjûn

Der wie ris in ryk man dy’t it yn de wrâld tige goed gien wie. Hy hie safolle eare en macht en rykdom wûn, dat er him neat mear winskje koe.

Mar hy fielde him ûngelokkich, want it leauwen fan syn jeugd dat wie er kwytrekke.

Hy besocht om it werom te roppen, mar hoefolle muoite oft er der ek foar die, it kaam net werom.

Doe kaam him wer yn it sin hoe’t er by syn pake thús de seider fierde en, hoe't by it skinken fan de fjirde beker wyn, dy't dy jûns dronken wurdt, Eliah der ûnsichtber ynkaam, en hoe’t der foar him dan ek in beker delset waard.

Omdat it krekt de deis foar it Joadske Peaskefeest wie, besleat er, syn ried te’n ein, nei de joadebuert ta te gean, om te sjen oft er dêr de profeet fine koe en oft dy him helpe woe.

De komst fan de profeet

En hy fûn him. Op ‘e hoeke fan in strjitte stie in âldman dy’t, doe’t er him seach, op him ôf kaam en sei:

'Kom ik haw op dy wachte.' Dat koe nimmen oars wêze as de profeet Eliah, dy't ommers yn elk stal ferskine kin, ek yn dat fan in bidler.  

'Myn frou hat noch neat foar it feest,' sei de man, 'want ik haw gjin jild.'

Dêrnei gongen se tegearre te boadskipjen. De earme man kocht, de rike man betelle.

Matses, fleis, fisk, en echte wyn (gjin rezinewyn) en alles wat men nedich hat foar in wiere seiderjûn.

Se kochten ek wat klean.

Doe woe de rike man ôfskied nimme, mar de earme man frege beskieden: 'Kom jûn op myn seider'.

En de rike man gong by de earme man te gast en frege him ôf, hoe’t it wêze soe, as de profeet de fjirde

beker delsette soe, dy’t ommers foar himsels ornearre wie.

De seider waard fierd mei geandewei grutter freugde, oant it momint kaam fan it wûnder dat ferwachte waard. En it wûnder barde. De earme man naam de beker, skonk him fol, sette him del foar syn gast en sei:

‘Drink en tink net dat ik net wit datsto it bist, do grutte en goede profeet Eliah, op wa’t ik al salang wachte haw.’

Doe wist de rike man wêr’t er sykje moast, wat er kwytrekke wie.

De oersetting fan dit Joadske peaskeferhaal fan Abel Herzberg is fan Rienk Klooster.

Gefoelens fan leechte en gemis . . .